Буолаары турар Дойду Төрүт сокуонугар киирэр уларытыылары талыы быыбарыгар нэһилиэк актыыбын кытары көрсүһүү
Бэс ыйын 19 күнүгэр, бастакы бөлөх Сунтаар улууһун Аҕа баһылыга Анатолий Григорьев салайааччылаах улуустааҕы үөрэҕирии управлениетын салайааччыта Альберт Иванов уонна тыа хаһаайыстыбатын управлениетын салайааччыта Иван Тихонов хочо эҥээр Куокуну, Кириэстээх уонна Тойбохой нэһилиэктэригэр сырыттылар.
Иккис бөлөх баһылыгы социальнай уонна имиджевай политикаҕа солбуйааччы Гаврил Еремеев салайааччылаах улуустааҕы ыччат бэлиитикэтин салаатын салайааччыта Евгений Данилов өрүс нөҥүө Хоро, Толоон уонна Күүкэй нэһилиэктэринэн сылдьан дойду Төрүт сокуонугар киирэр уларытыылары талыы бүтүн Арассыыйатааҕы куоластааһыныгар нэһилиэк актыыбын уонна быыбардыыр учаасток хамыыһыйатын чилиэттэрин кытта көрсөн сана сокуоҥҥа туох уларыйыылар киирээри туралларын сырдаттылар.
Олохтоохтор быыбардыыр учаастоктарга Роспотребнадзор санитарно-эпидемиологическай ирдэбилинэн дезинфикциялыыр уонна бэйэни харыстанар тэриллэринэн хааччынан куоластыырга бэлэмнэрин иһитиннэрдилэр.
Куоластааһын от ыйын 1 күнүгэр олохтоох бириэмэнэн сарсыарда 8 чаастан киэһэ 8 чааска диэри ыытыллар. Итини таһынан, куоластааччы куоластыыр учаастагар бэс ыйын 25 - 30 күннэригэр эрдэ куоластыан сөп. Куоластыыр учаастактар ити күннэргэ сарсыарда 10 чаастан киэһэ 18 чааска диэри аһаҕас буолуохтара. Эрдэ куоластааһын элбэх киһи мустубатын туһугар оҥоһуллар.
Аҕам саастаах дьоммутун доруобуйаларын харыстыыр сыалтан сайабылыанньаннан дьиэлэригэр тийэн куоластатыахтара.Сайылыктарга олорор уонна атын улуустартан кэлбит дьон эмиэ сайабылыанньа суруйан куоластыахтарын сөп буолар.
"Сунтаар улууhа (оройуона)" муниципальнай оройуон дьаһалтатын пресс – сулууспата.
