Сунтаарга тулаайах оҕолорго толору хааччыллыылаах квартиралар уонна чааһынай дьиэлэр күлүүстэрин туттардылар

Олунньу 10 күнүгэр, улуус дьаһалтатын аактабай саалыгар тулаайах уонна төрөппүт көрүүтэ-истиитэ суох хаалбыт оҕолору дьиэнэн хааччыйыы бырагыраамма чэрчитинэн, тоҕус киһиэхэ Маар-Күөлгэ, Тойбохойго уонна Сунтаар нэһилиэктэригэр тупсаҕай оҥоһуулаах, аныгы ирдэбилгэ эппиэттиир толору хааччыллыылаах квартиралар уонна чааһынай дьиэлэр күлүүстэрин туттардылар.

Эдэр ыалларга алаһа дьиэлэр күлүүстэрин, ону таһынан Сунтаар улууһун сайдыытын кэмиэрчэскэйэ суох тус сыаллаах пуондатын кэпсэтиитинэн, улууспут урбаанньыттарын — Седалищева З.В. ООО «Сайдам», Оконешникова М.П. ООО «Комплексстрой», ИП КФХ Попов С.В., ИП Васильева С.А., ИП Егоров Г.С ааттарыттан эдэр ыалларга дьиэҕэ киириилэринэн 15 тыһ. сууммаҕа миэбэл ыларга сертификаттары уонна «Туймаада» маҕаһыын ИП Герасимова А.П. бэлэхтэрин улуус Аҕа баһылыга Анатолий Григорьев туттарда.

Саҥа дьиэ күлүүһүн ылбыттар баҕа санаалара туоларыгар күүс-көмө буолбут дьоҥҥо махталларын биллэрдилэр. Быйыл 2020 сылга 5 тулаайах оҕо олорор дьиэнэн хааччыллара былааннанар.

«Сунтаар улууһа (оройуона)» муниципальнай оройуон дьаһалтатын пресс-сулууспата