Туймаада туонатыгар Сунтаар сириттэн силистээх биир дойдулаахтар түмсэллэр
Тохсунньу 25 күнүгэр, судаарыстыбаннай Саха Бриллиант циркэтин дьиэтигэр “СУНТААР МИИГИН ЫҤЫРАР” Саҥа дьылы уруйдуур дьоро киэһэҕэ биир дойдулаахтар оһуохайы оройуттан тутан, биир тэҥник хаамсан сомоҕолоһуу түһүлгэтин төрүттээтилэр.
Дьоро киэһэни талба талааннаахтар, уран, хомоҕой тыллаахтар ырыаннан, тойугунан киэргэттилэр. Людмила Спиридонова-Сунтаар Күөрэгэйэ таҥан оҥорбут, Сунтаар улууһун нэһилиэктэрин туһунан ырыаҕа ыпсаран, бар дьон сайаҕас санаатын түмэн, саха кутун умсугутар истиҥ тыллардаах ырыа хомуурунньугун киэҥ кэрэ эйгэҕэ таһаарда. Көрөөччүлэргэ сүрдээх сэргэх тэрээһин тэрилиннэ, ол курдук хас биирдии улуус нэһилиэктэриттэн төрүттээх Саха Сирин биллиилээх дьонноро ыллаан-туойан көрдөрдүлэр.
Үөрүүлээх тэрээһиҥҥэ Сунтаар улууһун Аҕа баһылыга Анатолий Григорьев, “АРКТИК КАПИТАЛ” ХЭУо генеарльнай дириэктэрэ Матвей Евсеев – бэйэлэрин үтүө холобурдарынан дьон-сэргэ ытыктабылын ылбыт аҕа саастаах ытык бэтэрээннэри эҕэрдэлээтилэр. Истиҥ иһирэх биэчэргэ «Сунтаар улууһун Бочуоттаах олохтооҕо» үрдүк ааты иҥэрии сиэрин-туома ыытылынна, ол курдук Сунтаар улууһун солуннарын, бэлиэ күннэрин, олоҕун-дьаһаҕын, дьонун-сэргэтин туһунан киэн араҥаҕа таһааран сырдатар үлэни туруулаһан ыытар өҥөтүн, бүтүн өрөспүүбүлүкэҕэ иһитиннэрэр үлэ сайдыытыгар тустаах кылаатын иһин «Кыым» хаһыат редакторын солбуйааччытыгар Нина Герасимоваҕа, Сунтаар улууһун олорор дьиэ коммунальнай хаһаайыстыбатын сайдыытыгар сүдү кылаатын, өр сыллаах таһаарыылаах үлэтин иһин өр сылларга «Олорор дьиэ коммунальнай хаһаайыстыба» СӨ судаарыстыбаннай унитарнай тэрилтэ Сунтаардааҕы филиалын салайааччытынан үлэлээбит, билигин киин куоракка бу тэрилтэ отделын начальнигынан ситиһиилээхтик үлэлии сылдьар Александр Даниловка, Сунтаар улууһун социальнай-экономическэй сайдыытыгар таһаарыылаах үлэтин, улууска юридическай көмө туруктаах буолуутугар сүдү кылаатын иһин өр сылларга СӨ Бэрэсидьиэнин уонна Бырабыытылыстыбатын правовой управлениетын салайааччытынан үлэлээбит, СӨ үтүөлээх юриһыгар Михаил Люй Денҥа СУНТААР УЛУУҺУН БОЧУОТТААХ ГРАЖДАНА үрдүк ааттар иҥэрилиннилэр. Ону таһынан Сунтаар улууһугар сибээс ситимин сайдыытыгар сүдү кылаатын, таһаарыылаах үлэтин иһин «ЭЛГЭЭЙИ НЭҺИЛИЭГИН БОЧУОТТААХ ГРАЖДАНИНА» үрдүк аат – сибээс, үлэ, тыыл уонна СӨ бочуоттаах бэтэрээнигэр Алексей Васильевка туттарылынна.
Υгэс буолбутунан сыл түмүгүнэн үтүө көрдөрүүлээх үөрэхтээх, сэргэх майгылаах, общественнай олоххо көхтөөх кыттыыны ылар, уһулуччу дьоҕурдаах Сунтаар эдэр ыччатын ааттаатылар. Ол курдук, Степан Филиппович Гоголев аатынан Дьокуускайдааҕы педагогическай колледж 4 куурсун устудьуона – Денис Иванов, «Дьокуускайдааҕы тыа хаьаайыстыбатын государственнай академиятын 2 куурсун устудьуона – Айаал Петров, Максим Кирович Аммосов аатынан Хотугулуу-Илинни федеральнай университет геолого-разведочнай факультет 3 куурсун устудьуона – Алексей Семенов буоллулар, кинилэргэ Сунтаар улууһун баһылыгын Махтал суруктара уонна стипендиялара туттарылыннылар.
"Сунтаар улууhа (оройуона)" муниципальнай оройуон дьаһалтатын пресс – сулууспата